Kryeministri Edi Rama, gjatë pjesëmarrjes në Forumin Europian të Inovacionit dhe Sipërmarrjes (Ruhr Summit) në Düsseldorf, theksoi se protesta që po zhvillohet prej më shumë se një muaji në Shqipëri, e njohur si "Revolucioni i Flamingove", është një mesazh që qeveria po e dëgjon me kujdes.
"Një qeveri që ndalon së dëgjuari, ndalon së qeverisuri", u shpreh Rama, duke sqaruar se përpjekja e tij është të kuptojë shqetësimet, ankthet dhe shpresat e qytetarëve, përtej numrit të pjesëmarrësve në bulevard. Ai e cilësoi këtë protestë si pjesë të transformimit demokratik të vendit, duke e krahasuar me periudhat e kaluara kur tubimet ishin të ndaluara ose të rrezikshme, duke shkaktuar humbje jetësh në të njëjtin vend.
Megjithatë, kreu i qeverisë ngriti shqetësimin mbi rolin e algoritmeve në platformat digjitale. Sipas tij, këto mekanizma shërbejnë për optimizimin e vëmendjes dhe shpesh deformojnë realitetin, duke e kthyer protestën në një arenë për aktorë dashakeqës. Rama argumentoi se algoritmet eliminojnë kompleksitetin dhe kontekstin, duke favorizuar indinjatën mbi debatin racional. Ky fenomen, sipas tij, nuk është specifik vetëm për Shqipërinë, por prek gjerësisht demokracitë perëndimore, ku vëmendja është bërë burimi më i rrallë dhe më i pushtetshëm.
Përditësime
Nga Gjermania, Kryeministri Edi Rama i cilësoi 'aktorë dashakeqës' ata që, sipas tij, po deformojnë karakterin e protestave. Ai nënvizoi se bulevardi është një hapësirë e ngarkuar historikisht nga dhuna, duke iu referuar ngjarjeve të kaluara ku tubimet kanë përfunduar me viktima.