Kryeministri Edi Rama zhvilloi një takim me kryebashkiakët, ku njoftoi hartimin e një plani të përbashkët mes Ministrisë së Bujqësisë dhe Ministrisë së Mbrojtjes për forcimin e infrastrukturës kritike kundër përmbytjeve. Ky plan synon ndërhyrje në kanale, argjinatura dhe hidrovore, që mbrojnë tokat dhe banesat, si dhe sigurojnë funksionimin e vazhdueshëm të sistemit.
Rama u kërkoi kryetarëve të bashkive të evidentojnë pikat e dobëta të sistemit të mbrojtjes dhe t’ia dërgojnë ministrit të Pushtetit Vendor, Ervin Demo, në një format të thjeshtë me prioritete. Këto analiza do të ndihmojnë në planifikimin e ndërhyrjeve, duke përfshirë financimin dhe forcat xheneiere nga Ministria e Mbrojtjes. Qeveria ka të dhënat nga Ministria e Bujqësisë dhe krizat e mëparshme, por kërkon kontributin e bashkive për ndërhyrje më të synuara.
Prodhimi i automjeteve zjarrfikëse
Rama paralajmëroi nisjen e prodhimit të automjeteve zjarrfikëse në një kompani të përbashkët shtetërore-private nën Ministrinë e Mbrojtjes. Këto mjete do të vendosen në dispozicion të bashkive. Gjithashtu, do të krijohet një flotë automjetesh për lehtësimin e ujitjes dhe pasojave të përmbytjeve.
Programi për parkimet dhe çështje të tjera
Kryeministri njoftoi vendimin për një program kombëtar për logjistikën e parkimeve, që synon zgjidhjen e problemeve në qytetet e mëdha dhe blloqet e banimit, duke i bërë ato me vlerë arkitektonike dhe hapësira të shfrytëzueshme nga komuniteti.
Ndër të tjera, Rama përmendi punën për sistemin e mbledhjes së mbeturinave, veçanërisht në zona turistike jo urbane, dhe ngritjen e një task forceje mes qeverisë dhe pushtetit vendor, të ngarkuar te ministri i Mjedisit. Po përgatitet një ndryshim ligjor për planifikimin dhe zhvillimin e territorit, me fokus te strehimi dhe projekte të veçanta.
Në përfundim të takimit, Rama u dha porositë kryebashkiakëve: "Këto punë që folëm, t’i bëjmë të gjitha dhe sa më mirë".