Kryeministri Edi Rama ka folur për protestat e fundit që po zhvillohen në Shqipëri gjatë podcastit të tij "Flasim". Kreu i qeverisë theksoi se ekzistojnë motive të ndryshme që shtyjnë qytetarët të dalin në shesh.
Sipas Ramës, ndër faktorët që ndikojnë në mobilizimin e protestuesve janë rrjetet sociale, "impulset nacionaliste" dhe manipulimet. Ai deklaroi se ndihet i zemëruar nga mesazhet e qytetarëve që kanë një hall real, duke shtuar se, po të mos ishte në detyrën e kryeministrit, do të ishte vetë pjesë e protestës.
Nga ana tjetër, kryeministri mbajti një qëndrim kritik ndaj atyre që i cilësoi si "sharlatanë apo hipokritë". Ai theksoi se nuk pranon që këto figura t'i tregojnë se si duhet drejtuar shteti, duke u zotuar se do të përballet në debat me të gjithë ata që i janë vënë pas.
"Çdo mesazh që më vjen në telefon unë e ndjek. Ata që më janë vënë pas do të më gjejnë pas, në aspektin e debatit. Nuk pranoj çdo sharlatan apo njeri të futur nga të tjerë, apo hipokritë që i kam parë në punë të marrin mikrofonin e të më thonë se si bëhet Shqipëria", deklaroi Rama.