Kryeministri Edi Rama zhvillon sot, më 27 prill, një mbledhje të zgjeruar me ministrat e kabinetit qeveritar dhe grupin parlamentar të Partisë Socialiste. Takimi mbahet në orën 11:00 në Pallatin e Brigadave në Tiranë.
Në qendër të diskutimeve është procesi i integrimit europian. Ministri për Evropën dhe Punët e Jashtme, Ferit Hoxha, dhe kryenegociatorja Majlinda Dhuka, pritet të raportojnë për ecurinë e negociatave me Bashkimin Evropian, veçanërisht për Kapitullin 24, që mbulon drejtësinë, lirinë dhe sigurinë.
Mbledhja vjen në një moment kur qeveria ka dorëzuar në Kuvend raportin për ecurinë e procesit të anëtarësimit. Shqipëria pret miratimin e pikave të ndërmjetme IBAR për të vazhduar me mbylljen e kapitujve të negociatave.
Gjithashtu, do të trajtohen çështje si koordinimi i qeverisë, hartimi i ligjeve dhe strategjia e Partisë Socialiste për zgjedhjet vendore. Kjo mbledhje synon të forcojë bashkëpunimin midis ekzekutivit dhe grupit parlamentar.
Përditësime
Kryeministri Edi Rama dha porosinë kryesore për miratimin e ligjeve në përputhje me BE-në gjatë mbledhjes së zgjeruar me qeverinë dhe grupin parlamentar të PS. Mbledhja, me temë “Punët për Shqipërinë”, zgjati rreth dy orë. Drejtuesit e qarqeve raportuan çështje nga qytetarët dhe mbështetësit e PS-së, ndërsa Rama mbajti fjalën e fundit për rreth një orë. Këto mbledhje zhvillohen rregullisht çdo muaj.