Kryeministri i Shqipërisë, Edi Rama, u ndal këtë të martë në Theth për një bashkëbisedim me banorët mbi të ashtuquajturën Paketë të Maleve. Sipas kreut të qeverisë, kjo nismë ligjore synon zhbllokimin e potencialit ekonomik të territoreve malore, duke u krijuar mundësi ligjore trashëgimtarëve për të zhvilluar pronat e tyre.
Duke iu përgjigjur shqetësimeve në opinionin publik, Rama nënvizoi se nisma nuk parashikon shitjen e tokave te oligarkët apo palë të treta. Ai sqaroi se paketa është hartuar për zonat ku toka nuk është trajtuar sipas ligjit 7501, pasi banorët aty i kanë ruajtur kufijtë e vjetër të pronësisë dhe nuk kanë pasur konflikte mes tyre.
Sipas Ramës, ka pasur një keqkuptim lidhur me qëllimet e kësaj pakete. Kryeministri theksoi se përpjekjet për ta paraqitur nismën si një mjet për uzurpimin e tokave janë të pabaza dhe u kërkoi banorëve të mos bien pre e informacioneve të pasakta. Ndër të tjera, ai adresoi çështjen e ndërtimeve pa leje në Theth, duke deklaruar se shtimi i tyre ndodhi si pasojë e keqinterpretimit nga banorët të premtimit qeveritar për legalizimin e objekteve ekzistuese, dhe jo si një nxitje për ndërtime të reja të paligjshme.
Përditësime
Kryeministri Edi Rama njoftoi mekanizmin e ri të zhvillimit për zonën e Thethit, pjesë e "Paketës së Maleve". Investitorët do të përfitojnë të drejtën e zhvillimit të pronës brenda perimetrit të përcaktuar me vlerën simbolike prej 1 euro. Pas përfundimit të investimit, ata do të pajisen me certifikatë pronësie.