Kryeministri Edi Rama mbajti këtë të premte një fjalim në Universitetin e Kombeve të Bashkuara në Tokio. Ai paraqiti rrugëtimin e Shqipërisë nga izolimi komunist drejt integrimit europian dhe e përshkroi vendin gjatë regjimit të kaluar si "Koreja e Veriut e Europës".
Rama theksoi se Shqipëria është sot më afër se kurrë me Bashkimin Europian. Ai shpjegoi se pas rënies së komunizmit shqiptarët bënë një zgjedhje ekzistenciale për demokracinë dhe se integrimi europian nuk është thjesht një proces burokratik, por një aspiratë kombëtare dhe një zgjedhje qytetërimi.
Kryeministri njoftoi se javën e ardhshme do të zhvillohet konferenca kyçe ndërqeveritare me Bashkimin Europian. Sipas tij, kjo konferencë do të hapë një fazë të re që synon mbylljen e negociatave brenda një viti e gjysmë.
Rama theksoi se rruga përpara mbetet sfiduese, por qeveria nuk ka asnjë plan B. Ai shtoi se anëtarësimi në BE lidhet me ndërtimin e institucioneve, forcimin e shtetit të së drejtës dhe luftën kundër korrupsionit.