Kryeministri Edi Rama deklaroi të dielën në podcastin Flasim se rreth 720 efektivë të Policisë së Shtetit do të përfitojnë rritje të mëtejshme pagash. Këta efektivë shërbejnë në vijën e parë të përballjes me rrezikun më të lartë dhe i përkasin strukturave si RENEA, Forcat Kombëtare të Sigurisë dhe Forcat e Posaçme Operacionale.
Sipas Ramas, paga e një inspektori në RENEA do të shkojë në afro 1.600 euro, ndërsa e një drejtuesi në këtë strukturë në afro 2.300 euro. Për forcat operacionale, paga e një inspektori parashikohet të arrijë rreth 1.200 euro, ndërsa e një kryekomisari ndodhet midis 1.600 dhe 1.700 euro.
Kryeministri theksoi se kjo rritje shoqërohet me investime në teknologji, trajnim dhe pajisje. Ai e cilësoi masën si pjesë e qasjes për forcimin e rendit dhe krijimin e një raporti të drejtë mes kërkesës për rezultate dhe vlerësimit të tyre.
Rama u shpreh: “Rreth 720 efektivë të Policisë së Shtetit, ata që shërbejnë në vijën e parë të përballjes me rrezikun më të lartë, do të përfitojnë rritje të mëtejshme page. Forcat RENEA, Forcat Kombëtare të Sigurisë dhe Forcat e Posaçme Operacionale do të mbështeten ende më shumë për punën sfiduese dhe të vyer që bëjnë në shërbim të komuniteteve, në shërbim të atdheut tonë të përbashkët.”