Në një intervistë të zgjeruar për podkastin Flasim Shqip, Kryeministri Edi Rama sqaroi qëndrimin e tij mbi vijimësinë politike në krye të Partisë Socialiste dhe të qeverisë. Ai hodhi poshtë çdo spekulim se do të ndikojë në emërimin e një pasardhësi, duke theksuar se kandidatët duhet të ndërtojnë vetë profilin dhe karrierën e tyre politike.
“Unë personalisht nuk kam ndërmend të zgjedh pasardhës. Pasardhësi ose pasardhësja le të dalë dhe të marrë përsipër PS-në. Mos mendoni se kujt i vjen radha, sepse nuk është hapur gara. Bëjini hyzmetin karrierës suaj dhe figurës suaj duke bërë detyrën tuaj”, u shpreh Rama. Ai shtoi se pas kalimit të stafetës, synon të mbetet anëtar aktiv i organizatës së Surrelit, duke siguruar se nuk do të ndërhyjë në punën e drejtuesve të ardhshëm.
Lidhur me të ardhmen e tij pas mandatit, kryeministri la të hapur mundësinë për angazhime të tjera profesionale, por nënvizoi se fokusi i tij i menjëhershëm është përmbushja e kontratës qeverisëse. Sipas Ramës, procesi i integrimit në Bashkimin Evropian është një “vrapim kundër orës” që kërkon angazhim të vazhdueshëm.
Kryeministri argumentoi se anëtarësimi i vendit është i lidhur pazgjidhshmërisht me vazhdimësinë e qeverisjes nga Partia Socialiste. “E shoh derën e BE-së hapur dhe atë derë ne mund ta kapërcejmë vetëm kështu”, deklaroi ai, duke paralajmëruar se ndërprerja e ritmit aktual do të sillte vonesa të konsiderueshme në rrugën integruese të vendit.
Përditësime
Kryeministri Edi Rama mohoi kategorikisht mundësinë e marrjes së postit të Presidentit të Republikës pas përfundimit të mandatit të tij në krye të qeverisë. Ai theksoi se pas largimit nga detyra, synimi i tij është angazhimi në aktivitete të tjera profesionale jashtë jetës politike.