Kryetari i Partisë Socialiste, Edi Rama, gjatë një aktiviteti të zhvilluar në Tiranë për 35-vjetorin e themelimit të kësaj force politike, vlerësoi rolin e saj në historinë e Shqipërisë. Ai u shpreh se pavarësisht gabimeve të bëra ndër vite, partia nuk është lëkundur në vijën e saj për mbrojtjen e interesit kombëtar.
“Kjo parti kurrë nuk është lëkundur në vijën e drejtë të mbrojtjes së interesit kombëtar. Nëse Shqipëria ka një arkivë për të gjithë kontribuuesit e çështjes kombëtare, në atë listë është edhe Partia Socialiste”, deklaroi Rama. Kryeministri vlerësoi gjithashtu rolin e socialistëve në mbështetjen e Kosovës, duke theksuar se UÇK-ja u mbështet jo vetëm me fjalë, por edhe me vepra.
Në fjalën e tij, kreu i qeverisë e cilësoi procesin e integrimit të Shqipërisë në Bashkimin Evropian si objektivin më të rëndësishëm strategjik. Sipas tij, mbështetja për Partinë Socialiste në këtë fazë lidhet drejtpërdrejt me këtë proces. “Të rreshtohesh sot me PS-në është të rreshtohesh me fuqinë e shqiptarëve për ta çuar Shqipërinë krenare aty ku për shumë kohë është parë si një vend me bisht”, tha ai.
Kryeministri paralajmëroi se ky proces nuk do të jetë i lehtë, pasi sipas tij, ekzistojnë forca politike, si brenda Shqipërisë ashtu edhe në shtete të tjera evropiane, të cilat punojnë kundër integrimit të vendit. Ai u bëri thirrje qytetarëve që të angazhohen për të mbajtur sytë te horizonti, duke theksuar se kjo sfidë kërkon përkushtim dhe qytetari të vazhdueshme.
Përditësime
Kryeministri Edi Rama theksoi se integrimi i plotë i Shqipërisë në Bashkimin Evropian mbetet objektivi kryesor i Partisë Socialiste. Ai u kërkoi qytetarëve që, pavarësisht pakënaqësive ndaj administratës apo përfaqësuesve vendorë, të mbështesin këtë kauzë kombëtare. Gjithashtu, Rama paralajmëroi se procesi i anëtarësimit po përballet me pengesa nga forca kundërshtuese, si brenda vendit, ashtu edhe në nivel ndërkombëtar.