Edi Rama, kryeministër i Shqipërisë, foli para grupit parlamentar të Partisë Socialiste më 16 janar 2026, duke u ndalur te mundësia e bashkëpunimit me opozitën.
Ai u shpreh se opozita e ka derën të hapur në çdo moment për dialog dhe bashkëpunim, por nuk do të ketë ulje në tryezë me zor. "Grupi parlamentar socialist duhet të vijojë punën pa u ndalur në asnjë moment, por pa ia mbyllur derën në asnjë rast opozitës", tha Rama.
Kreu i qeverisë u bëri thirrje socialistëve të vazhdojnë përpara pa u kthyer pas, pasi "lehjet" e opozitës do të bëhen më të forta. Ai akuzoi opozitën se jashtë kufijve përshkruan Shqipërinë si narkoshtet, ndërsa brenda pengon punën për vendin dhe anëtarësimin në Bashkimin Evropian.
Rama theksoi gatishmërinë për bashkëpunim, duke iu përgjigjur thirrjeve të partnerëve ndërkombëtarë për dialog dhe konsensus. "Karriget janë aty, duan të vijnë, bujrum; duan të japin alternativë, mirëse të vijnë", deklaroi ai. Megjithatë, shtoi se nuk do të presin askënd për të vazhduar punën.
Në përfundim, Rama deklaroi: "Ne përpara, ata mbrapa. Sa më mbrapa të mbeten, aq më e fortë do të vijojë jehona e lehjes së tyre, sepse ajo që ata bëjnë, në shqipen time, quhet lehaqenie".