Kryeministri Edi Rama ka kërkuar një ndryshim rrënjësor në mënyrën e funksionimit të administratës publike, duke vënë theksin te llogaridhënia për vonesat ndaj kërkesave të qytetarëve. Gjatë një takimi me strukturat e bashkëqeverisjes, zëvendësministrat dhe drejtuesit e drejtorive, kreu i qeverisë deklaroi se shkeljet e afateve nuk do të kalojnë më pa pasoja.
Sipas Kryeministrit, qeveria do të zbatojë projektin e njohur si Pasqyra Albania (ose Ligji i Pasqyrës), i cili do të përcaktojë qartë se çdo vonesë duhet të ketë një përgjegjës të identifikuar, i cili do të mbajë edhe koston e kësaj shkeljeje. Rama theksoi se institucionet duhet të shmangin përgjigjet e paqarta apo zvarritjet, të cilat ai i cilësoi si “torturë” për qytetarët.
Kreu i qeverisë kërkoi që çështjet me pengesa ligjore të klasifikohen në kategori të ndryshme, në mënyrë që vendimmarrësit të japin një përgjigje përfundimtare për mundësinë e zgjidhjes së tyre. Ai u kërkoi zëvendësministrave që të ndjekin në mënyrë të përditshme bilancin e përgjigjeve të dhëna dhe të analizojnë arsyet e çdo vonese në shërbim të qytetarëve.
“Zëvendësministrat që janë të përcaktuar duhet ta kenë këtë prioritetin numër një të punës së tyre të përditshme. Duhet ta nisin ditën me sa përgjigje u dhanë dje, sa përgjigje duhen dhënë sot dhe sa përgjigje nuk u dhanë në kohë dhe duhet të merren pastaj me ato përgjigje që nuk u dhanë në kohë”, theksoi Rama.