Kryeministri Edi Rama ka reaguar lidhur me kallëzimin penal të depozituar në SPAK nga shoqatat e magjistratëve kundër ministrit të Financave, Petrit Malaj, sekretarit të përgjithshëm të ministrisë, si dhe drejtuesve të degëve të Thesarit në rrethe. Konflikti lidhet me moszbatimin e ekzekutimit për rritjen e pagave të gjyqtarëve, një çështje që ka krijuar ngërç mes sistemit të drejtësisë dhe ekzekutivit.
Në një reagim në rrjetet sociale, Rama vlerësoi qëndrimin e ministrit Malaj si të drejtë dhe të konsultuar paraprakisht me të dhe me ministrin e Drejtësisë, Toni Gogu. Kryeministri u shpreh se në kallëzimin e magjistratëve mungon emri i tij dhe i ministrit të Drejtësisë, duke e ironizuar këtë nismë si një “histori bajate” të vetërritjes së pagave nga kategoria më e mirëpaguar në Republikën e Shqipërisë.
Sipas kreut të qeverisë, skuadrat juridike të ekzekutivit kanë shprehur unanimisht qëndrimin se pushteti gjyqësor nuk mund të hapë derën e thesarit të shtetit për të rritur pagat në mënyrë të pavarur. Rama nënvizoi se menaxhimi dhe shpenzimi i buxhetit është kompetencë ekskluzive e pushtetit legjislativ. Ai konfirmoi se pagat do të rriten vetëm përmes një vendimi të Kuvendit të Shqipërisë, në respekt të plotë të vendimit të Gjykatës Kushtetuese.