Kryeministri Edi Rama ka reaguar përmes një komunikimi në rrjetet sociale lidhur me protestat e fundit, duke theksuar se qeveria po i ndjek me vëmendje shqetësimet e qytetarëve që kanë protestuar paqësisht. Ai deklaroi se nuk ka paragjykuar personat që kërkojnë një mjedis më të mbrojtur dhe një shtet më të drejtë.
Kreu i qeverisë mohoi akuzat se ka sulmuar popullin ose rininë që ka marrë pjesë në tubime. Ai bëri një dallim të qartë midis qytetarëve të ndershëm dhe grupeve që, sipas tij, përhapin dezinformim. Rama u shpreh se ka bërë dallimin midis "ditës së flamingos" dhe "natës së korbit dhe sorrës", duke shtuar se është angazhuar një grup pune për të mbajtur shënim çdo kërkesë të qytetarëve.
"Po dëgjojmë me shumë vëmendje, një grup i mbledhur enkas po mban çdo shënim. Hap pas hapi, do t'i komunikojmë me njerëz të zakonshëm e të ndershëm të këtij vendi," u shpreh Rama.