Kryeministri Edi Rama është shprehur se qeveria po monitoron me vëmendje tubimet që po zhvillohen çdo mbrëmje në bulevard. Sipas kreut të qeverisë, një ekip i ngritur për këtë qëllim po dëgjon kërkesat e qytetarëve, pavarësisht vështirësive në komunikim.
Në qëndrimin e tij, të shprehur në podkastin “Flasim”, Rama e përshkroi situatën si komplekse. Ai bëri një ndarje mes dy shtresave të pjesëmarrësve në protestë: ata që shprehin shqetësime dhe halle reale, dhe ata që i cilësoi si “kore e zezë” e dështakëve-zemërakë, të cilët nxisin tensione dhe veprime të dhunshme.
Sipas Ramës, procesi i dialogut po përballet me një “mur bllokues”, i cili nuk lejon komunikim efektiv. Ai argumentoi se shfaqja e elementëve të dhunës ndikon negativisht në përpjekjet për një dialog konstruktiv mes palëve. Pavarësisht kësaj, kryeministri theksoi se institucionet mbeten të vëmendshme për të dëgjuar zërin e protestuesve, duke e cilësuar këtë si një domosdoshmëri përkundër situatës së tensionuar në terren.
Përditësime
Kryeministri Edi Rama u zotua se qeveria do të respektojë standardet e Bashkimit Evropian në çdo zhvillim. Në lidhje me protestat, ai i përshkroi protestuesit e sinqertë si 'ujë të rrjedhshëm', ndërsa për mbështetësit e opozitës paralajmëroi se ndjekja e politikës së Sali Berishës çon në një 'mur' pa dalje.