Gjatë episodit të fundit të podkastit "Flasim", Kryeministri Edi Rama lexoi publikisht letrën e qytetarit Amos Mezuraj, i cili denoncoi vonesat disavjeçare në trajtimin e pasojave të tërmetit të nëntorit 2019 për pallatin ku banonte.
Në mesazhin e tij, Mezuraj theksoi se bashkë me 12 familje të tjera kanë ndjekur rrugët institucionale, përfshirë Bashkinë e Tiranës dhe Avokatin e Popullit, pa marrë një përgjigje përfundimtare. Qytetari denoncoi faktin se pas premtimeve të marra nga bashkia në prani të deputetëve përpara zgjedhjeve, çështja është deleguar vazhdimisht mes institucioneve për mungesë kompetencash, duke e rikthyer problemin në pikën zero.
Kryeministri Rama pranoi zhgënjimin e qytetarëve dhe kritikoi administratën për mosmbajtjen e përgjegjësive. Ai deklaroi se çështja ishte referuar më herët te Bashkia e Tiranës, por nuk është zgjidhur në kohë. Rama e vlerësoi zemërimin e qytetarëve si të drejtë dhe legjitim, duke bërë një dallim me protestat që, sipas tij, motivohen nga agjenda politike për të nxitur përçarje.
“Askush nuk duhet detyruar t’i shkruajë kryeministrit, sepse institucionet që paguhen për t’i adresuar këto probleme duhet ta bëjnë punën e tyre”, u shpreh Rama. Ai u bëri thirrje qytetarëve që të mos lejojnë që hallet e tyre të shfrytëzohen nga grupe që nuk kërkojnë zgjidhje, por synojnë përfitim politik.
Përditësime
Banorët e prekur nga tërmeti, të cilët jetojnë në një pallat pranë Ministrisë për Evropën dhe Punët e Jashtme, kanë zhvilluar protesta para Kryeministrisë. Qytetari Amos Mezuraj konfirmoi se kërkesa e tyre kryesore është zgjidhja e problematikës së banesave.