Gjatë zhvillimit të seancës plenare këtë të enjte, protesta e zhvilluar para godinës së Kuvendit regjistroi tensione të larta. Protestuesit fillimisht hodhën miell dhe vezë në drejtim të mjeteve të deputetëve, për të vijuar më pas me përplasje fizike me forcat e rendit, duke dëmtuar një pjesë të gardhit metalik.
Në përgjigje të situatës, policia përdori spray djegës për të mbajtur turmën në distancë, ndërsa protestuesit hodhën sende të forta dhe gurë drejt efektivëve. Si pasojë e përplasjeve, dy punonjës të policisë pësuan lëndime dhe kërkuan ndihmë mjekësore. Autoritetet konfirmuan se tetë qytetarë janë shoqëruar për në komisariat.
Kryeministri Edi Rama reagoi përmes rrjeteve sociale, duke e cilësuar zhvillimin si një kthim të "filmit të vjetër të konfliktit". Ai deklaroi se protesta, e cila në fillim u shfaq si shprehje e qytetarisë dhe atdhedashurisë, u shndërrua në dhunë, duke akuzuar ata që i quajti si pjesë të "politikës së dështimit" për nxitje të tensioneve.
Përditësime
Protesta para Kuvendit hyri sot në ditën e saj të 33-të. Përshkallëzimi i kërkesës për dorëheqjen e Qeverisë solli përplasje fizike me forcat e rendit, duke detyruar Policinë e Shtetit të zgjerojë perimetrin e sigurisë rreth institucionit.
Kryeministri Edi Rama ka ashpërsuar tonet ndaj protestës së zhvilluar para Kuvendit. Në një reagim të dytë në platformën 'X', ai i ka cilësuar organizatorët dhe përfaqësuesit e medias si 'dështakëzemërakë të bulevardit politiko-mediatik'.