Në Pallatin e Kongreseve në Tiranë, më 26 prill, u zhvillua finalja e Festivalit Kombëtar të Shkencës. Nxënësit e gjimnazeve prezantuan projekte kërkimore, eksperimente, prototipe inxhinierike dhe zgjidhje digjitale. Rreth 6000 nxënës nga 300 gjimnaze morën pjesë në këtë platformë konkuruese dhe promovuese.
Kryeministri Edi Rama, i pranishëm në ceremoninë e shpalljes së fituesve, vlerësoi angazhimin e të rinjve. Ai theksoi se Shqipëria ka nevojë për të aktivizuar potencialin e gjeneratës së tyre. "Jeni shumë të vegjël me parametrat e vjetër, por shumë gati me parametrat e kohës së re kur inovacioni dhe transformimet epokale në teknologji vijnë nga shtrati juaj", u shpreh ai.
Rama përmendi përparimet në sektorin publik, ku Shqipëria u kthye në pararojë rajonale dhe u dallua në Europë për shërbime publike online. Megjithatë, ai pranoi se në sektorin privat ka ende shumë për t’u bërë. "Së bashku me ministren e Ekonomisë dhe Inovacionit, po punojmë për të rritur në mënyrë të konsiderueshme financimet për startup-et dhe mbështetjen për ata që kanë potencial për t’u bërë krijues dhe themelues", deklaroi kryeministri.
Ai siguroi nxënësit se qeveria do të bashkëpunojë me shkollat për të krijuar një sistem mbështetës me financime për zhvillimin e projekteve të tyre. Rama inkurajoi bashkëpunimin me shkolla të mesme dhe universitete për të rritur kapacitetet dhe për të aksesuar fondet e Bashkimit Evropian.
Fituesi i festivalit
Çmimin e parë e fitoi shkolla e mesme “Zhani Ciko” në Patos me projektin “Parku Inteligjent i Bletëve”. Projekti ndërthur teknologjinë me natyrën, duke u fokusuar në rëndësinë e bletëve, monitorimin mjedisor, edukimin STEM dhe zhvillimin ekonomik lokal. Ai u vlerësua për qasjen inovative dhe mesazhin për qëndrueshmërinë.