Kryeministri i Shqipërisë, Edi Rama, priti në një vizitë kortezie ambasadorin e ri të Republikës së Turqisë në Tiranë, B. Ceyhun Erciyes. Gjatë takimit të zhvilluar në Kryeministri, palët vlerësuan nivelin e shkëlqyer të marrëdhënieve dypalëshe dhe ecurinë e bashkëpunimit në fusha të ndryshme.
Bashkëbiseduesit riafirmuan vullnetin e përbashkët për thellimin e mëtejshëm të marrëdhënieve, me theks të veçantë mbi zhvillimin e bashkëpunimit ekonomik. Kryeministri Rama e përshëndeti ambasadorin e ri përmes një njoftimi në rrjetin social 'X', ku shprehu kënaqësinë për pritjen e përfaqësuesit të një vendi vëllazëror.
Në njoftimin e publikuar nga Ambasada e Turqisë në Tiranë, u bë e ditur gjithashtu se ambasadori Erciyes ka shprehur kënaqësinë për vizitën e ardhshme që kryeministri Rama pritet të zhvillojë në Ankara. Kjo vizitë është planifikuar në kuadër të Samitit të NATO-s.