Rama prezanton projektin me Emiratet për gjurmimin e naftës në Shqipëri

Edi Rama prezantoi një projekt të ri në bashkëpunim me Emiratet e Bashkuara Arabe për të rritur kontrollin dhe transparencën në tregun e karburanteve në Shqipëri.

Gjatë një bashkëbisedimi me furnizuesit e naftës, kryeministri bëri të ditur krijimin e kompanisë publike Alb Trais, e cila do të mundësojë gjurmimin teknologjik të të gjitha sasive të naftës dhe produkteve të akcizës që hyjnë në vend.

Sipas Ramës, metoda e mëparshme e identifikimit me ngjyrues rezultoi joefikase, pasi ngjyruesi shpëtonte lehtësisht. Teknologjia e re lejon ndjekjen e padukshme të karburanteve, pa ndërhyrë në transport dhe pa nevojë për shoqërim fizik nga doganierët.

"Prej disa kohësh kemi krijuar një kompani të re publike në ortakëri me Emiratet e Bashkuara, që quhet ‘Alb Trais’, kompani publike që do bëjë gjurmimin e të gjitha produkteve të akcizës me teknologji.
Së shpejti do hyjë në treg me gjurmimin, dhe ndjekjen e naftës që do të thotë gjurmimi i gjithë sasive të naftës që hyn në tregun shqiptar do garantohet me një teknologji të fjalës së fundit.
Sepse nga të gjitha analizat e bëra rezultoi që ai ngjyruesi që përdorej për naftë ishte nganjëherë më kollaj për t’u kthyer në ujë sesa bojërat që unë përdor për zhgarravinat e mia.
Pra ky produkt i ri është i pakapshëm nga një sy tjetër, veçse nga syri magjik i prodhuesit, ndërsa ndjekja do të thotë që do mbyllim epokën e shoqërimit të naftës që hyn në Shqipëri me objektivin për të qenë tranzit dhe do e ndjekim nga shumë larg pa shqetësuar as shoferët tuaj që kur kalojnë kufirin nga mbrapa doganierë.
Ndjekja do bëhet me teknologji që nuk e sheh dot asnjë sy", tha kryeministri.

Ky projekt synon të ndihmojë furnizuesit kundër konkurrentëve të pandershëm dhe evazionit fiskal, në një kohë kur çmimet globale të karburanteve janë rritur për shkak të tensioneve në Lindjen e Mesme.