Gjatë pjesëmarrjes në forumin europian të inovacionit dhe sipërmarrjes Ruhr Summit në Dusseldorf të Gjermanisë, kryeministri Edi Rama njoftoi zhvillimin e një sistemi të bazuar në Inteligjencën Artificiale (IA), që synon forcimin e institucioneve dhe proceseve të prokurimit publik. Sipas Ramës, ëndrra e tij është që ky produkt të finalizohet dhe t'i shitet Gjermanisë, me qëllim që të kontribuojë në luftën kundër korrupsionit edhe në këtë shtet. Gjatë kësaj deklarate, salla e pranishme shpërtheu në të qeshura.
Kjo deklaratë shkaktoi reagimin e kryetarit të partisë Mundësia, Agron Shehaj, i cili e konsideroi qëndrimin e kryeministrit si ironi ndaj qytetarëve shqiptarë. Shehaj theksoi se, ndërkohë që qeveria po përballet me protesta popullore prej 31 ditësh në bulevard, ku kërkohet dorëheqja e kryeministrit dhe llogaridhënia përballë drejtësisë, Rama po promovon iniciativa të tilla jashtë vendit.
Sipas Shehajt, këto deklarata janë një përpjekje e kryeministrit për të shmangur vëmendjen nga situata e brendshme politike dhe problemet me drejtësinë, duke shtuar se ëndrra e shqiptarëve mbetet largimi i qeverisë dhe vendosja e barazisë përpara ligjit.