Kryeministri Edi Rama ka reaguar ndaj protestave që kanë hyrë në ditën e 15-të kundër ndërtimit të një resorti në Zvërnec. Sipas kreut të qeverisë, këto manifestime po ndikojnë negativisht në imazhin e vendit dhe po prodhojnë efekte të dëmshme për sektorin e turizmit.
Rama theksoi se ka marrë mesazhe nga operatorë turistikë që raportojnë anulime të rezervimeve për sezonin veror, duke paralajmëruar se një gjë e tillë rrezikon ekonominë kombëtare dhe ato familjare. Ai veçoi situatën në Vlorë, ku sipas tij, shumica e operatorëve turistikë mbështesin zhvillimin dhe nuk janë pjesë e këtyre protestave.
Kryeministri adresoi gjithashtu mënyrën e komunikimit të protestuesve, duke e cilësuar atë si një "frymë fashiste". Ai deklaroi se është e papranueshme imponimi i mendimit përmes kërcënimeve dhe bullizmit në rrjetet sociale ndaj atyre që mendojnë ndryshe. Rama u shpreh se kjo sjellje duhet të marrë fund përmes mosnënshtrimit ndaj presioneve të tilla, duke i cilësuar individët që ushtrojnë dhunë verbale si "hajvanë".
Sipas Ramës, ndër protestuesit ka njerëz të shqetësuar sinqerisht për zhvillimin, por pjesa dominante e lëvizjes udhëhiqet nga një axhendë që nuk përkon me interesat e qytetarëve të Vlorës dhe të vendit në tërësi.