Kryeministri Edi Rama ka njoftuar se punimet në Banjat e Bënjës po vijojnë me ritme të shpejta. Kjo pasuri e rrallë natyrore do të ofrojë së shpejti standarde moderne, duke ruajtur njëkohësisht vlerat historike dhe mjedisore që e bëjnë unike.
Projekti përfshin sistemimin e zonës së parkimit, ndërtimin e korsive të biçikletave, krijimin e ballkoneve panoramike mbi kanion, organizimin e hyrjes, ndërtimin e banjave publike si dhe një qendër shëndetësore. "Një transformim i plotë që e çon turizmin në një tjetër nivel", theksoi Rama.
Aktualisht ka nisur faza e arredimit, me vendosjen e parvazëve të shkallëve dhe shtrimin e dyshemesë me dru dekorativ pranë vaskave, për të krijuar një pamje më estetike dhe në harmoni me natyrën përreth.
Investimi i Qeverisë Shqiptare zbatohet nga Fondi Shqiptar i Zhvillimit, në bashkëpunim me Agjencinë Kombëtare të Zonave të Mbrojtura dhe Bashkinë Përmet. Synimi është rritja e cilësisë së infrastrukturës turistike dhe promovimi i qëndrueshëm i zonës.