Kryeministri Edi Rama ka reaguar në lidhje me dorëzimin e librit "The Albanian Files" në SPAK nga një grup qytetarësh, të cilët protestojnë kundër investimeve në zonën e Zvërnecit. Në rrjetet sociale, kreu i qeverisë e ironizoi nismën duke e quajtur librin "të mallkuar" dhe duke shkruar se ai sapo ka hyrë në histori si i pari libër që trajtohet si provë krimi, 80 vjet pas rënies së nazizmit dhe 35 vjet pas rënies së komunizmit.
Sipas qytetarëve, libri përfaqëson një përmbledhje të krimeve të kryera nga kryeministri. Ata pretendojnë se dokumentacioni i përfshirë dëshmon për 523 projekte që kanë shmangur procesin e konsultimit publik.
Në një prononcim të mëparshëm, Edi Rama sqaroi se nuk është autor i librit, por ka shkruar vetëm parathënien. Ai e përshkroi përmbajtjen e librit si një tekst auto-ironik dhe bëri të ditur se publikimi do të jetë së shpejti në dispozicion të lexuesve në librarinë "Adrion" në Tiranë.