Kryeministri Edi Rama ka reaguar përmes rrjeteve sociale në lidhje me një incident të regjistruar gjatë protestës së zhvilluar në Tiranë, ku një pjesëmarrës është përballur me presion dhe i është hequr nga dora flamuri i komunitetit LGBTQI+. Në reagimin e tij, kryeministri publikoi pamje nga ngjarja, duke vlerësuar se një sjellje e tillë nuk përfaqëson vlerat e vendit.
“Kjo nuk është Shqipëria në të cilën besojmë dhe sigurisht jo Shqipëria që po ndërtojmë si anëtare krenare e familjes evropiane. Solidaritet i plotë me djalin që është bërë objekt bullizmi. Asnjë qenie njerëzore nuk duhet të poshtërohet, përjashtohet apo të vihet në shënjestër për faktin se është ndryshe. Turp për bullizuesit”, shkroi Rama.
Ky reagim i kryeministrit vjen në ditën e 11-të të protestës së qytetarëve, të cilët kundërshtojnë projektet për ndërtimin e resorteve në zona të mbrojtura, siç është Zvërneci. Ndërsa një pjesë e mediave vunë në dukje se reagimi i kreut të qeverisë u përqendrua te ky incident, në të njëjtën kohë, Ministria e Shëndetësisë ka ndërmarrë hapa për trajtimin hormonal të personave transgjinorë në sistemin publik, si pjesë e reformave për integrimin në Bashkimin Evropian.