Kryeministri Edi Rama ka reaguar në platformën X për sulmet e Iranit ndaj vendeve të Gjirit Persik, ku u lëshuan raketa dhe dronë, duke shkaktuar dëme dhe viktima.
Ai dënoi sulmet ndaj infrastrukturës kritike dhe zonave civile, duke i cilësuar ato si goditje ndaj stabilitetit, prosperitetit dhe vizionit të përbashkët rajonal. Rama vlerësoi aftësinë e vendeve të Gjirit për të interceptuar dhe neutralizuar raketat, duke nxjerrë në pah kapacitetet e avancuara mbrojtëse, koordinimin dhe vendosmërinë strategjike.
Në postimin e tij, kryeministri shkruan: “Arabia Saudite dhe Katari, dy xhevahire rrezatuese në kurorën vezulluese të një Lindjeje të Mesme të re, të përcaktuar nga shpresa, zhvillimi marramendës dhe bashkëpunimi i guximshëm rajonal, kanë treguar edhe një herë se si duket udhëheqja e përgjegjshme përballë agresionit të papërgjegjshëm. Raketat u interceptuan, kërcënimi u neutralizua dhe mesazhi ishte i qartë: ata që luajnë bixhoz me kaosin do të përballen me forcë dhe saktësi.”
Rama thekson se fuqia e vërtetë qëndron te uniteti i vendeve të Gjirit, të cilat qëndrojnë krah për krah kundër përçarjes. Ai shpreh solidaritet të plotë dhe të palëkundur edhe me Kuvajtin dhe Bahreinin, duke deklaruar: “Në Gjir, siguria është e pandashme. Siguria e njërit është forca e të gjithëve.”
Më herët, Rama kishte deklaruar përkrahje edhe ndaj Emirateve të Bashkuara Arabe.