Kryeministri i Shqipërisë, Edi Rama, ka reaguar përmes një mesazhi në platformën X lidhur me ngjarjen e rëndë në Berlin, ku një automjet u fut në turmën e pjesëmarrësve gjatë Paradës së Krenarisë, të njohur si Christopher Street Day.
Në emër të Qeverisë së Shqipërisë, Rama shprehu ngushëllime për familjen e viktimës dhe u uroi shërim sa më të shpejtë të gjithë të plagosurve, numri i të cilëve është konfirmuar në 16 persona. Në deklaratën e tij, kreu i qeverisë theksoi se ngjarje të tilla nuk mund të tolerohen, pasi kërcënojnë sigurinë dhe vlerat thelbësore mbi të cilat mbështeten demokracitë.
“Jam thellësisht i tronditur nga lajmi tragjik që vjen nga Berlini. Në emër të Qeverisë së Shqipërisë, shpreh solidaritetin tonë më të sinqertë me Gjermaninë dhe popullin gjerman. Nuk mund të ketë asnjë tolerancë për urrejtjen, dhunën apo ekstremizmin, në çfarëdolloj forme që ato shfaqen. Ato kërcënojnë jo vetëm sigurinë e qytetarëve tanë, por edhe vetë vlerat mbi të cilat qëndrojnë demokracitë tona. Duhet të qëndrojmë të bashkuar kundër tyre, me vendosmëri dhe pa asnjë hezitim”, u shpreh Rama.
Sipas autoriteteve gjermane, ngjarja ndodhi në zonën Tiergarten, ndërsa policia vijon hetimet për zbardhjen e rrethanave dhe motiveve të këtij akti. Shqipëria është rreshtuar krah Gjermanisë në këtë moment të vështirë, duke dënuar çdo formë dhune që synon të cenojë liritë qytetare dhe paqen sociale.