Kryetari i Komunës së Prishtinës, Përparim Rama, ka reaguar lidhur me debatin për nismën e vendosjes së tarifave për automjetet që nuk janë të regjistruara në territorin e kryeqytetit. Ai ka sqaruar se bëhet fjalë për një propozim në fazën e konsultimit publik dhe jo për një vendim përfundimtar.
Sipas draft-rregullores në diskutim:
• Për automjetet që nuk janë të regjistruara në Komunën e Prishtinës, tarifa e propozuar është 1 deri në 2 euro.
• Për kamionët e mëdhenj që hyjnë në qendër të kryeqytetit, tarifa propozohet deri në 10 euro.
• Për vizitorët që kalojnë natën në qytet, është parashikuar një taksë akomodimi prej 1 euroje për natë.
Nga ky detyrim pritet të përjashtohen automjetet e emergjencës, ato të institucioneve publike gjatë detyrës zyrtare, si dhe banorët rezidentë të Prishtinës.
Kryetari Rama ka argumentuar se kjo masë shqyrtohet si mekanizëm alternativ për sigurimin e mjeteve të nevojshme për ndërtimin e Unazës së Kryeqytetit, një projekt me vlerë rreth 206 milionë euro. Sipas tij, rreth 40% e kësaj vlere parashikohet të jetë grant nga BERZH. Ai ka deklaruar se aktualisht këto fonde mbeten të bllokuara nga qeveria, çka ka detyruar komunën të kërkojë alternativa të tjera financimi.
Draft-rregullorja për tarifat dhe ngarkesat komunale parasheh gjithashtu ndryshime për disa kategori biznesesh, si rritje të taksave për farmacitë dhe motelet, si dhe përgjysmimin e taksës për institucionet mikrofinanciare (nga 1000 në 500 euro). Kryetari Rama ka ftuar qytetarët, ekspertët dhe shoqërinë civile të kontribuojnë me sugjerime në këtë proces diskutimi.
Përditësime
Kryetari i Prishtinës, Përparim Rama, i është përgjigjur përmes Facebook-ut kritikave mbi propozimin për vendosjen e tarifave për hyrje në kryeqytet, të cilin shoqëria civile e ka cilësuar si 'diskriminues'. Ndërkohë, Ministria e Financave nuk u është përgjigjur kërkesave të KOHA-s për një qëndrim zyrtar lidhur me pretendimet për bllokim të fondeve nga BERZH-i.