Kryeministri Edi Rama u prit më 9 shkurt nga Presidenti i Këshillit Europian António Costa në një darkë pune në Bruksel.
Të dy liderët diskutuan për hapat që do të ndërmerren në vijim në lidhje me procesin e negociatave për anëtarësimin e plotë të Shqipërisë në Bashkimin Europian.
Kabineti i Presidentit të Këshillit Europian njoftoi se "Shqipëria ndodhet në një moment kritik. Janë bërë përpjekje të rëndësishme gjatë viteve. Tani ato duhet të mbështeten dhe të konsolidohen".
Sipas të njëjtit kabinet, Kryeministri Rama konfirmoi se reformat kyçe, veçanërisht në gjyqësor, të drejtat themelore dhe luftën kundër korrupsionit, mbeten përparësi kryesore. Presidenti Costa riafirmoi mbështetjen e vazhdueshme të BE-së për përpjekjet e Shqipërisë për t’i çuar përpara ato.
Takimi u zhvillua në kontekstin e dialogut politik me Shqipërinë dhe shtetet e tjera kandidate për anëtarësim, sipas zyrës së shtypit të Presidentit të Këshillit Europian.
Një çështje kryesore e mbetur pezull është Raporti i Vlerësimit të Standardeve për Reformimin e Gjyqësorit, i njohur si IBAR, i lidhur me kapitujt 23 dhe 24 të negociatave. Shqipëria nuk e ka marrë ende këtë raport të plotë dhe të miratuar nga shtetet anëtare të BE-së. Pa aprovimin e tij, procesi i mbylljes së kapitujve nuk mund të ecë përpara.
Në diskutime të mëparshme në nivel ambasadorësh, është kërkuar që Shqipëria të ofrojë prova konkrete mbi ndëshkimin e zyrtarëve të lartë të akuzuar, përfshirë vendime përfundimtare të gjykatave dhe sekuestra të pasurive.