Kryeministri Edi Rama ka reaguar ndaj protestave të vazhdueshme të qytetarëve lidhur me resortin turistik të planifikuar në Zvërnec të Vlorës. Përmes një postimi në rrjetet sociale, ai mbrojti investitorët, vëllezërit Moutaz dhe Ramez Al-Khayyat, duke theksuar se blerja e truallit privat është kryer përmes transaksioneve bankare të çertifikuara nga institucione kombëtare dhe ndërkombëtare.
Sipas qeverisë, investimi do të realizohet nga kompania Albania Land Development, e cila është në bashkëpunim me Jared Kushner, dhëndrin e ish-presidentit amerikan Donald Trump. Kryeministri publikoi dy projekte të mëparshme të konglomeratit Power Holding për të argumentuar përvojën e investitorëve në zhvillime që respektojnë mjedisin.
Kryeministri theksoi rëndësinë ekonomike të projektit, duke deklaruar se protestuesit po përdoren si "vegla qorre" nga një "luftë hibride" në rrjetet sociale. Ai e krahasoi situatën me kundërshtimet e mëparshme për ndërtimin e stadiumit kombëtar "Air Albania", duke argumentuar se zhvillimi i vendit mbetet prioritet.
Nga ana tjetër, qytetarët vazhdojnë të shprehin shqetësimin mbi ndikimin mjedisor të resortit në zonën e Zvërnecit. Megjithatë, kreu i qeverisë ftoi qytetarët të njihen me aktivitetin e Power Holding për të kuptuar natyrën e investimeve që pritet të transformojnë turizmin në Shqipëri.