Kryeministri Edi Rama deklaroi në podkastin "Flasim" se qeveria ka miratuar aktin normativ për uljen e akcizës me 20% për naftën sapo çmimi i saj të kalojë 220 lekë për litër, ndërsa për benzinën pragu është 200 lekë për litër. Ky vendim hyn në fuqi menjëherë pas tejkalimit të këtyre pragjeve.
Rama theksoi se masa synon të mbrojë konsumatorët nga ndikimi i zhvillimeve në tregjet ndërkombëtare, të nxitura nga lufta dhe pasiguritë globale, pa rrezikuar stabilitetin e financave publike. "Këto pragje janë paracaktuar për të garantuar një ndërhyrje të drejtë dhe të balancuar në raport me zhvillimet e tregut, të cilat nuk i kemi në dorë", u shpreh ai.
Vendimi do të mbetet në fuqi deri në stabilizimin e plotë të situatës ndërkombëtare. Bordi i Transparencës ka filluar monitorimin e tregjeve globale për të reflektuar ndryshimet në mënyrë të verifikueshme në tregun vendas, duke siguruar zbatim të drejtë.
Rama paralajmëroi se distributorët që shkelin çmimet e përcaktuara nga Bordi i Transparencës do të përballen me masa drastike, për të parandaluar abuzimet ndaj qytetarëve dhe drejtuesve të automjeteve.