Kryeministri Edi Rama ka vendosur një kusht për kryebashkiakët e Partisë Socialiste që synojnë të rikandidojnë në zgjedhjet lokale të 2027. Gjatë një takimi në Asamblenë e Partisë Socialiste në njësinë nr. 2 të Tiranës, pas mbledhjes së socialistëve, ai deklaroi se ata duhet të sjellin minimalisht 10 kontrata të firmosura për Paketën e Maleve.
Sipas Ramës, pa këtë minimum, kryebashkiakët nuk do të kenë mundësi të rikandidojnë, "edhe sikur të kenë bërë mrekullira". "Kemi shumë aplikime dhe kemi vendosur një normë, një objektiv që të gjitha ata kryetarë bashkish që duan të rikandidojnë, nuk mund të rikandidojnë nëse nuk kanë vënë me firmë 10 kontrata minimumi për Paketën e Maleve. Në momentin që hapet kjo rrugë, të tjerët vijnë më lehtë", u shpreh ai.
Kryeministri hodhi poshtë akuzat se Paketa e Maleve shërben për oligarkët. "Ju keni dëgjuar që kjo paketa e maleve është bërë për oligarkët, por këtu në Shqipëri nuk ka oligarkë. Kjo fjalë është shpikur nga ata që u ka ngelur në grykë fjala kulakë", tha Rama. Ai shpjegoi se paketa lidhet drejtpërdrejt me njerëzit që posedojnë prona të trashëguara, por nuk i zhvillojnë për mungesë të titullit të pronësisë. Këta përfitues gëzojnë një procedurë të shpejtë dhe financim pas saj.
Në të njëjtin fjalim, Rama përmendi përmirësime në prokurimet publike, ku Shqipëria ka kaluar nga vendi i fundit në atë të parë. Ai vlerësoi platformën e-Albania për ndryshimin e jetës së qytetarëve dhe theksoi nevojën për përmirësime në procesin e përzgjedhjes së organizatave.