Ish-kryetari i Aleancës për Ardhmërinë e Kosovës (AAK), Ramush Haradinaj, ka shprehur përkrahjen e tij për nismën qytetare Marshin për Liri. Përmes një video-adresimi, ai ka ftuar qytetarët që më 12 shtator të bashkohen në sheshin Skënderbeu në Prishtinë.
Ngjarja organizohet nga platforma qytetare Liria ka Emër nën moton Kosova po pret. Sipas njoftimeve, ky organizim vjen në mbështetje të çlirimtarëve dhe drejtësisë, vetëm katër ditë përpara seancës së fundit të procesit gjyqësor ndaj ish-krerëve të Ushtrisë Çlirimtare të Kosovës (UÇK), të cilët ndodhen në paraburgim në Hagë. Haradinaj theksoi rëndësinë e kësaj pjesëmarrjeje, duke deklaruar se qytetarët duhet të jenë bashkë në këtë thirrje për drejtësi dhe kthimin e çlirimtarëve në Kosovë.