Platforma qytetare Liria ka Emër prezantoi nismën "Kosova po pret", pjesë e së cilës është "Marshi për Liri" që do të zhvillohet më 12 shtator në Prishtinë. Kjo nismë vjen në prag të shpalljes së vendimit të Dhomave të Specializuara në Hagë për themeluesit dhe drejtuesit e Ushtrisë Çlirimtare të Kosovës, datë e caktuar për 16 shtator.
Sipas përfaqësuesve të platformës, Eliza Hoxha dhe Ismail Tasholli, qëllimi i marshit është bashkimi i qytetarëve përtej dallimeve politike, gjeografike apo shoqërore, për të përcjellë mesazhin se lufta për liri ishte e drejtë. Ismail Tasholli bëri thirrje për një mobilizim gjithëpërfshirës, duke ftuar liderët e partive kryesore në vend, si Albin Kurti, Bedri Hamza, Lumir Abdixhiku, si dhe përfaqësues të tjerë politikë, të marrin pjesë dhe të japin adresimet e tyre publike në këtë marsh, pa simbole partiake.
Kryetari i Partisë Demokratike të Kosovës, Bedri Hamza, ka shprehur mbështetjen e plotë për këtë nismë. Përmes një videomesazhi, ai u ka bërë thirrje strukturave të partisë dhe qytetarëve të të gjitha gjeneratave që të marrin pjesë masivisht, duke vlerësuar se mbrojtja e së vërtetës së luftës është çështje e dinjitetit shtetëror.
Aktivitetet mbështetëse do të nisin më 22 gusht me vendosjen e ekraneve "LED" në Prishtinë dhe nëpër komuna të tjera, të cilat do të shfaqin numërimin mbrapsht deri në ditën e verdiktit. Përveç marshit në Prishtinë, më 16 shtator, platforma "Liria ka Emër" ka paralajmëruar organizimin e një aktiviteti paralel në Hagë, në bashkëpunim me diasporën shqiptare, ndërsa në Kosovë do të zhvillohen edhe "Netët e lirisë" nëpër shtatë zonat e UÇK-së.
Përditësime
Platforma qytetare Liria ka Emër zyrtarizoi sot moton e marshit të 12 shtatorit, e cila do të jetë 'Kosova po pret'. Përfaqësuesit e platformës njoftuan organizimin përmes një konference për shtyp. Kryetari i PDK-së, Bedri Hamza, konfirmoi angazhimin e plotë të të gjitha strukturave partiake, nga degët deri te nëndegët, për të siguruar një mobilizim masiv në këtë marsh proteste.
Platforma 'Liria ka Emër' emëroi Eliza Hoxhën si zëdhënëse zyrtare për nismën e organizimit të marshit. Në një thirrje drejtuar spektrit politik, Ismail Tasholli kërkoi unitet ndërpartiak për këtë protestë. Njëkohësisht, organizatorët konfirmuan se aktiviteti paralel në Hagë do të ketë si objektiv specifik kërkesën për lirimin e Hashim Thaçit dhe tre ish-komandantëve të tjerë të UÇK-së që po përballen me procesin gjyqësor.
Platforma 'Liria ka Emër' shpalosi detajet e fushatës mobilizuese për marshin e 12 shtatorit, duke konfirmuar organizimin e tretë të kësaj natyre. Aktivitetet 'Netët e Lirisë' do të nisin përmes bashkëbisedimeve përreth zjarrit me veteranë dhe ushtarë të UÇK-së në të shtatë zonat operative. Inisiativa 'Kosova po pret' do të shtrihet në të gjitha komunat, duke përfshirë qendra si Prizreni, Skenderaj, Peja dhe Lipjani.