Sot, në orën 14:00, në kryeqytetin e Kosovës organizohet “Marshi për Liri”, një tubim solidarizues që synon të përcjellë mesazhe mbështetjeje për ish-krerët e Ushtrisë Çlirimtare të Kosovës. Aktivitetet do të zhvillohen në sheshet “Zahir Pajaziti”, “Nëna Terezë” dhe “Skënderbeu”.
Programi i marshit parashikon tetë folës, mes të cilëve përfaqësues të platformës “Liria ka Emër”, si Eliza Hoxha dhe Ismail Tasholli, si dhe përfaqësues të shoqatave të dala nga lufta, si Hysni Gucati. Në tribunë do të jenë gjithashtu Liriona Sulejmani, vajza e dëshmorit Bajram Sulejmani, dhe Buna Mustafa, e bija e Salih Mustafës. Përfaqësuesit politikë që kanë konfirmuar pjesëmarrjen dhe fjalën e tyre në këtë tubim janë kryetari i PDK-së, Bedri Hamza, dhe kryetari i AAK-së, Ardian Gjini.
Sipas njoftimit zyrtar të Policisë së Kosovës, janë ndërmarrë masa të nevojshme operative për garantimin e rendit dhe qetësisë publike. Për shkak të lëvizjes së pjesëmarrësve, do të bllokohen për qarkullim rrugët:
• Agim Ramadani
• Luan Haradinaj
• Enver Zymberi
Policia ka bërë të ditur se, varësisht nga situata në terren, mund të ketë ndërprerje të përkohshme edhe në rrugë të tjera, ndërsa njësitë patrulluese do të orientojnë trafikun drejt rrugëve alternative. Autoritetet u kanë bërë thirrje pjesëmarrësve të respektojnë udhëzimet e zyrtarëve policorë për një mbarëvajtje sa më paqësore të aktivitetit.
Organizatorët kanë siguruar transport të organizuar me autobusë për qytetarët nga qytete të ndryshme të Kosovës. Kjo nismë vjen në një kohë të ndjeshme, katër ditë para shpalljes së aktgjykimit ndaj katër ish-krerëve të UÇK-së nga ana e Dhomave të Specializuara në Hagë, proces i cili është shtyrë disa herë për shkak të vëllimit të gjerë të provave.
Përditësime
Qytetarët kanë filluar grumbullimin në sheshin Skënderbeu për t'iu bashkuar marshimit. Pjesëmarrësve nga Shqipëria u janë shtuar radhët pasi kanë kaluar pikën kufitare të Morinit. Komuna e Prishtinës ka hequr pagesat për transportin publik dhe të gjitha parkingjet publike për ditën e sotme. Përfaqësues të komuniteteve fetare, përfshirë Myftiun e Kosovës dhe Ipeshkvin e Kosovës, kanë shprehur mbështetjen e tyre për këtë marshim. Organizatorët kanë konfirmuar zyrtarisht emrat e të gjithë folësve në pjesën formale të tubimit.
Organizatorët konfirmuan se marshimi do të nisë zyrtarisht në ora 14:00, duke zgjeruar shtrirjen e tubimit edhe në sheshet 'Zahir Pajaziti' dhe 'Nëna Terezë'. Pjesëmarrjen e kanë konfirmuar lideri i BDI-së, Ali Ahmeti, si dhe deputetët e Lëvizjes Vetëvendosje: Arton Konushevci, Adnan Rrustemi, Valon Hoti dhe Salih Zyba. Në mbështetje të ish-krerëve të UÇK-së janë angazhuar edhe përfaqësues të PDK-së dhe AAK-së. Përveç qytetarëve nga Kosova, në Prishtinë kanë mbërritur grupe të shumta të diasporës, përfshirë një numër të konsiderueshëm shqiptarësh nga Zvicra.
Qeveria e Kosovës vlerësoi lart organizimin, duke falënderuar pjesëmarrësit për sjelljen paqësore dhe dinjitoze gjatë marshit. Ky tubim shënon muajin e 70-të të paraburgimit për ish-krerët e UÇK-së në Hagë. Në marsh u shfaqën figura publike si Endrit Thaçi dhe Taulant Balla. Ndryshe nga raportimet e mëparshme, Dhomat e Specializuara pritet të shpallin aktgjykimin më 16 shtator.
Organizatorët e nismës 'Liria Ka Emër' konfirmuan pjesëmarrjen e rreth 100 mijë qytetarëve në marshin e mbajtur sot në Prishtinë. Policia e Kosovës konfirmoi përmes një njoftimi zyrtar se aktiviteti përfundoi pa incidente dhe në qetësi të plotë. Qeveria e Kosovës reagoi pas mbylljes së marshit, duke falënderuar qytetarët dhe organizatorët për disiplinën dhe mbarëvajtjen e sigurt të tubimit.
Mbi 8 mijë qytetarë nga Shqipëria iu bashkuan marshimit për liri në Prishtinë. Sipas të dhënave zyrtare, rreth 2 mijë automjete me targa të Shqipërisë kaluan pikën kufitare për të mbështetur ish-krerët e UÇK-së.
Agjencitë ndërkombëtare të lajmeve, përfshirë Reuters, Associated Press dhe AFP, kanë raportuar gjerësisht mbi marshimin, duke e vënë theksin te kërkesa e protestuesve për drejtësi në prag të vendimit të Dhomave të Specializuara. Platforma 'Liria ka Emër' ka publikuar materiale vizuale dhe fotoalbume për të dokumentuar pjesëmarrjen masive të qytetarëve në këtë aktivitet.
Mediat ndërkombëtare si The Washington Post, France24, Washington Times dhe Bloomberg i janë bashkuar pasqyrimit të marshit në Prishtinë. Protestuesit janë përqendruar masivisht në sheshet Nëna Terezë dhe Zahir Pajaziti. Një orë dixhitale e vendosur në qendër të qytetit shënon kohën mbrapsht deri në shpalljen e aktgjykimit në Hagë. Pjesëmarrësit mbajnë pankarta me mbishkrime si 'Në emër të popullit, shpallini të pafajshëm' dhe 'Çlirimtarët, kthejini në shtëpi'.