Drejtoria e Mbrojtjes nga Zjarri dhe Shpëtimit ka publikuar raportin për vitin 2025, ku konstatohet një rritje e rasteve të zjarreve me 306 krahasuar me 10 226 rastet e vitit 2024. Ky vit shënoi një sezon zjarri më intensiv dhe më të gjatë, me rritje të shpejtësisë së djegies dhe më shumë ndërhyrje zjarrfikëse, veçanërisht gjatë muajve të verës, për shkak të valëve të nxehtësisë dhe thatësirës.
Sipërfaqet e djegura në 2024 ishin më të mëdha, por ngarkesa operative në 2025 u rrit ndjeshëm, duke reflektuar zgjerimin e rolit të shërbimit në menaxhimin e emergjencave. Raporti nënvizon nevojën për rishikim dhe shtim të kapaciteteve njerëzore dhe logjistike.
Inspektimet u rritën me 806 krahasuar me vitin e mëparshëm, duke shënuar zhvillim pozitiv në parandalim. Megjithatë, krahasuar me rritjen e zjarreve, ndikimi i tyre mbetet i kufizuar dhe kërkohet riorientim drejt sektorëve me rrezik të lartë.
Ndërhyrjet për shpëtim arritën në 1871 raste gjatë 2025-s, me nivelin më të lartë në dhjetor (296 raste) dhe më të ulëtin në shkurt (71 raste).