Raporti i përbashkët i Ministrisë së Drejtësisë dhe Ministrisë së Punëve të Brendshme për vrasjen e Arlinda Zekajt evidenton mangësi, vonesa dhe mosveprime nga institucionet përgjegjëse për sigurinë dhe mbrojtjen e saj. Zekaj u vra më 25 tetor 2026 në Vitomiricë të Pejës, pak minuta pasi Policia e Kosovës e shoqëroi deri në shtëpi. Dokumenti shqyrton veprimet e Policisë së Kosovës, Qendrës për Punë Sociale në Pejë dhe institucioneve të drejtësisë.
Sipas raportit, Zekaj kishte përjetuar për më shumë se 12 vjet dhunë fizike dhe psikologjike nga bashkëshorti, me të cilin ishte martuar në vitin 2010. Ajo ishte kthyer në Kosovë më 2024 me djalin e saj, ndërsa bashkëshorti qëndronte kryesisht në Shtetet e Bashkuara të Amerikës.
Autoritetet ishin njoftuar se bashkëshorti posedonte armë me leje, por në dokumentacionin e shqyrtuar nuk figurojnë veprime të policisë për sekuestrimin e saj. Raporti përmend edhe një episod të dhjetorit 2025. Sipas deklarimeve të Zekajt, bashkëshorti e kishte kërcënuar dhe ofenduar, i kishte kërkuar të largohej nga shtëpia dhe më pas u kishte vënë zjarrin sendeve të saj personale. Ajo ia kishte dorëzuar policisë një video të ngjarjes.
Gjykata Themelore në Pejë kishte nxjerrë urdhër mbrojtjeje, i cili e detyronte bashkëshortin t’i mundësonte Zekajt kthimin dhe përdorimin e shtëpisë së përbashkët. Urdhri përcaktonte distancë prej dy metrash brenda banesës dhe 20 metrash jashtë saj. Megjithatë, sipas raportit, ajo vazhdonte t’i njoftonte policisë se nuk arrinte të hynte në shtëpi. Në disa raste, ankesat i kishte paraqitur deri në dy herë brenda ditës, duke kërkuar rivlerësim të rrezikut dhe masa shtesë mbrojtjeje.
Raporti trajton edhe procedurat për kujdesin ndaj djalit të mitur, për të cilin gjykata kishte vendosur që t’i besohej nënës. Më 26 tetor, një ditë pas vrasjes, gjykata pranoi kërkesën e prokurorisë për autopsi. Instituti për Mjekësi Ligjore kreu procedurat përkatëse dhe raporti përfundimtar pritej t’i përcillej prokurorit të rastit.
Sipas Gazetës Sinjali, për vrasjen dyshohet kunati i Zekajt, Albert Sylaj, i cili u arrestua dy ditë pas ngjarjes. Sinjali thekson se evidentimi i lëshimeve institucionale nuk përbën vetvetiu konstatim përfundimtar të përgjegjësisë penale të zyrtarëve.