Në tremujorin e parë të vitit 2026, vdekjet rrugore dhe nga krimi në Shqipëri u ulën me 21% krahasuar me të njëjtën periudhë të vitit 2025. Sipas analizës së Eduard Zaloshnjës, këto vdekje përbëjnë mbi gjysmën e vdekjeve jonatyrale, ndërsa parandalimi i tyre është detyrë parësore e Policisë së Shtetit.
Vdekjet rrugore u ulën me 15.4%, ndërsa ato nga krimi me 50%. Kjo ndodh pavarësisht rritjes së numrit të automjeteve me targa shqiptare me rreth 40 mijë njësi brenda një viti, pa llogaritur automjetet me targa të huaja.
Indeksi i vdekshmërisë rrugore, i llogaritur si vdekje për 100 mijë automjete me targa shqiptare, u ul me pothuajse një të pestën brenda vitit. Vdekjet e këmbësorëve, biçiklistëve dhe motoçiklistëve përbëjnë mbi gjysmën e vdekjeve rrugore. Nëse këto do të ishin në përqindje si në Bashkimin Evropian, indeksi shqiptar do të barazonte mesataren europiane.
Vdekshmëria nga krimi, e matur si vdekje për 1 milion banorë, u përgjysmua krahasuar me 2025. Vdekjet nga krimi brenda familjes mbeten problem i madh, por nëse do të krahasoheshin me nivelin e BE-së, indeksi do të afrohej me mesataren europiane.
Me rastin e fillimit të punës së një drejtori të ri të Policisë së Shtetit, Qendra Agenda zhvilloi një sondazh opinioni për sigurinë e qytetarëve dhe punën e policisë. Linku i pyetësorit u shpërnda me SMS të rastësishme dhe mori 1192 përgjigje nga banorët.