BIRN siguroi nga Kryeministria, nëpërmjet kërkesave për të drejtë informimi, katër regjistra të dhuratave të pranuara nga kryeministri Edi Rama gjatë periudhës 2013–2026. Pas eliminimit të regjistrimeve të përsëritura, analiza identifikoi 753 objekte, të dhuruara nga presidentë, kryeministra, diplomatë dhe personalitete të tjera.
Regjistri më i hershëm, që mbulon vitet 2013–2018, shënon edhe emrat e dhuruesve. Në vitin 2013, kryeministri i atëhershëm turk Recep Tayyip Erdogan figuron si dhurues i një pjate me kapak argjendi, ndërsa presidenti francez François Hollande i dhuroi Ramës një pjatë argjendi dhe një gotë, të dyja të zbukuruara me stemën e Francës. Në listë është edhe Joe Biden, atëherë zëvendëspresident i Shteteve të Bashkuara, si dhurues i një ore tavoline të markës Chelsea.
Ish-presidenti i Maqedonisë George Ivanov figuron si dhurues i një guri rubini të vendosur mbi pllakë mermeri, ndërsa ish-kryeministri i Kosovës Hashim Thaçi ka dhuruar një hartë të Kosovës të punuar në gur. Kryetari i atëhershëm i Parlamentit maqedonas, Trajko Veljanovski, dhuroi dy maska të përshkruara si prej ari. Princi saudit Sultan bin Salman bin Abdulaziz Al Saud figuron si dhurues i një shpate të vogël ceremoniale.
Regjistrat e mëvonshëm, që mbulojnë periudhat 2018–2020, 2021–2022 dhe 2022–2026, përmbajnë qindra objekte të tjera, por nuk shënojnë emrat e dhuruesve. Mes tyre janë një orë dekorative me bazament, e përshkruar si “St. Michael Over the Devil” (“Shën Mëhilli mbi Djallin”), një shpatë e vogël me ngjyrë ari, një objekt argjendi që paraqet Katedralen e Bukureshtit, si dhe një palë këpucë dhe një top futbolli të punuara në filigran me ngjyrë ari.
Inventari përfshin gjithashtu një replikë të një pikture të Gustav Klimt, një statujë Pegasi, një ikonë të Shën Marisë, koleksione monedhash, medalje përkujtimore dhe objekte dekorative. Mes punimeve me motive historike e kombëtare janë një gravurë në bakër e Ali Pashë Tepelenës, një portret i Hashim Thaçit, një pikturë e anijes “Vlora” me emigrantë dhe punime që paraqesin Gjergj Kastriotin Skënderbeun. Regjistrat përmbajnë edhe dhjetëra libra, albume fotografike, medalje dhe suvenire përkujtimore.
Më 27 shtator, pas kthimit nga Asambleja e Përgjithshme e Kombeve të Bashkuara në Nju Jork, Rama publikoi një videomesazh nga aeroporti ndërkombëtar “Nënë Tereza”. Ai hodhi poshtë akuzat për korrupsion dhe përfitime të paligjshme, përfshirë pretendimin se kishte marrë një orë të shtrenjtë nga persona të lidhur me krimin e organizuar. Rama tha se dhuratat e marra gjatë ushtrimit të detyrës ishin regjistruar si pronë shtetërore dhe iu referua muzeut të dhuratave në selinë e qeverisë, ku ruhet një pjesë e koleksionit.