Andrei Ilinbayev kontaktoi për herë të fundit familjarët më 3 tetor, duke u thënë se kishte kaluar kontrollin mjekësor dhe po përgatitej të shkonte në luftën në Ukrainë. Më pas, ai nuk iu përgjigj më mesazheve të tyre. Fqinjët i thanë familjes se Ilinbayev kishte shkuar të regjistrohej në ushtri në Ufa, kryeqytetin e Bashkortostanit, në jugperëndim të Rusisë. Vendndodhja e tij dhe rrethanat e rekrutimit mbeten të paqarta.
Sipas të afërmve, Ilinbayev ka nevoja të veçanta për shkak të një sëmundjeje të rëndë mendore që e ka prekur që në fëmijëri. Pas vdekjes së të atit, ai jetonte me të ëmën, e cila ka demencë. Familjarët thanë se nuk besonin se ai mund t’i kuptonte pasojat e nënshkrimit të një kontrate me ushtrinë. Një e afërme, e identifikuar si Marina, i tha Radios Evropa e Lirë se fillimisht kishte menduar se ai po bënte shaka kur i tregoi për kontrollet mjekësore.
Rasti i tij nxjerr në pah koston njerëzore të një sistemi rekrutimi që mbështetet gjithnjë e më shumë te kompani private dhe ndërmjetës. Sipas vlerësimeve të inteligjencës perëndimore, lufta në Ukrainë ka shkaktuar të paktën 1,5 milionë të vrarë ose të plagosur.
Pagesat për rekrutuesit
Autoritetet rajonale dhe komunale u japin shpërblime personave që sjellin kandidatë për shërbim ushtarak me kontratë. Sipas medias së pavarur ruse The Insider, disa rekrutues marrin deri në 1,2 milionë rubla (15.300 dollarë) për çdo rekrutim. Kjo shumë krahasohet me pagën mesatare në Rusi, e cila raportohet të jetë rreth 113.000 rubla (1.380 dollarë).
Qeveritë rajonale financojnë organizata që punësojnë nënkontraktorë dhe agjentë individualë. Rekrutuesit zakonisht paguhen pasi kandidati nënshkruan kontratën ushtarake. Sipas përllogaritjeve të medias së pavarur ruse Important Stories, të paktën 8 miliardë rubla (98 milionë dollarë) janë shpenzuar për stimuj rekrutimi të financuar nga shteti që kur sistemi nisi të përdorej, në fund të vitit 2024. Kjo shifër nuk pasqyron domosdoshmërisht vlerën e plotë të pagesave.
Në Nizhni Tagil, në rajonin e Sverdlovskut, autoritetet raportohet se kanë ndarë 100 milionë rubla (1,22 milionë dollarë) për shpërblime rekrutimi më 2026. Përmes një programi rajonal ofrohen 400.000 rubla (4.900 dollarë) për çdo person të rekrutuar. Në Penzë, shpenzimet për shpërblime u rritën nga rreth 3 milionë rubla (36.700 dollarë) më 2024 në pothuajse 31 milionë rubla (379.600 dollarë) më 2025, sipas shifrave zyrtare. Disa pagesa mbahen sekret, duke e vështirësuar përcaktimin se kush përfiton prej tyre.
Në shtator, një prokuror në Nizhni Tagil propozoi heqjen e bonuseve, duke argumentuar se ato nxisnin veprimtarinë e grupeve kriminale dhe rekrutimin e personave të përjashtuar nga shërbimi ushtarak për arsye shëndetësore. Autoritetet e qytetit e hodhën poshtë propozimin, duke thënë se pagesat ndihmonin në përmbushjen e synimeve të rekrutimit. Në fund të tetorit, qyteti ndaloi që punonjësit dhe zyrtarët komunalë e shtetërorë të merrnin bonuse, por skema u mbajt në fuqi.
Personat e cenueshëm
Aktivistët për të drejtat e njeriut dhe ish-rekrutuesit thonë se stimujt financiarë kanë ndihmuar në krijimin e një industrie rekrutimi ku mund të vihen në shënjestër njerëz të cenueshëm ndaj presionit. Këtu përfshihen persona me çrregullime mendore, varësi ose borxhe të mëdha, si dhe ata që kanë pak familjarë që mund të ndërhyjnë për t’i mbrojtur.