Kosova triumfoi me 4-3 ndaj Sllovakisë mbrëmjen e djeshme në kuadër të kualifikimeve për Kupën e Botës, duke shkuar më afër se kurrë drejt saj.
Biznesmeni Remzi Ejupi, ish-president i FC Prishtina, ka publikuar një analizë ku thekson se performanca e përfaqësuesve kosovarë shkon përtej aspektit taktik. Ai shkruan: «E pashë ndeshjen e Kosovës me Sllovakinë dhe nuk pashë vetëm futboll. Pashë diçka që nuk shpjegohet me taktikë, me formacion, me trajner si Foda. Pashë një energji që nuk lind në fushë, por jashtë saj, në shtëpi, në rrëfime, në kujtime që nuk janë të tyre, por që i kanë marrë si barrë dhe si detyrim».
Sipas Ejupit, futbollistët kosovarë mbartin histori familjare dhe kombëtare. «Këta djem nuk janë rritur vetëm me topin. Janë rritur me tregimet e prindërve të tyre. Me historitë e një kohe kur nuk kishte shtet, kur kishte frikë, përjashtim e padrejtësi», shkruan ai. Kur veshin fanellën e Kosovës, ata nuk veshin vetëm një uniformë sportive, por një kujtesë dhe histori që i shtyn të japin më shumë se loja kërkon.
Ejupi shpjegon se kjo energji i bën lojtarët të luajnë për të provuar ekzistencën dhe për të mos lënë historinë vetëm si rrëfim. «Ata nuk luajnë vetëm për të fituar. Luajnë për të treguar se janë këtu. Dhe kjo është arsyeja pse shpesh duken sikur japin më shumë se ç’kanë».
Megjithatë, ai vë në dukje se kjo motivim emocional është edhe barrë. «Kur i shoh duke luajtur, nuk i gjykoj si sportistë të zakonshëm. I shoh si djem që ende luftojnë për prindërit e tyre. Për atë që nuk duhet të përsëritet më». Për të arritur nivelin më të lartë, Kosova duhet të kalojë nga kjo barrë historike drejt një strukture sportive të qëndrueshme.