Për shkak të temperaturave të larta dhe mungesës së reshjeve, rezervuari hidroenergjetik i Fierzës po përballet me rënie të ndjeshme të prurjeve ujore. Sipas të dhënave të datës 06 gusht 2026, niveli i liqenit ka zbritur në kuotën 283.89 metra, duke qëndruar larg nivelit maksimal prej 296 metrash.
Në Hidrocentralin e Fierzës janë aktualisht në punë tre nga katër agregatët, të cilët gjenerojnë një fuqi aktive prodhimi prej rreth 300 megavatësh. Për të përballuar rritjen e konsumit të energjisë elektrike gjatë muajve të verës, KESH ka ndërmarrë masa për të garantuar furnizimin e pandërprerë të vendit.
Në përputhje me strategjinë për periudhën korrik–shtator 2026, korporata ka blerë 331 mijë megavat/orë energji elektrike. Kjo sasi është siguruar me një kosto totale prej 41.5 milionë eurosh. Institucionet përgjegjëse u kanë bërë thirrje qytetarëve që të tregohen të kujdesshëm në konsumin e energjisë, duke shmangur përdorimin e panevojshëm të saj në këtë periudhë të karakterizuar nga kushtet e vështira hidrike.