Prodhimi i energjisë elektrike nga kaskada e Drinit gjatë vitit 2025 rezultoi rreth 22% më i ulët se mesatarja 30-vjeçare, sipas të dhënave të Korporatës Elektroenergjetike Shqiptare (KESH). Kjo rënie lidhet me një vit të thatë me prurje të ulëta uji, që kufizoi gjenerimin e hidrocentraleve.
Prodhimi në kaskadë arriti në rreth 3.4 milionë MWh, krahasuar me mesataren historike prej 4.35 milionë MWh. Prurjet mesatare në rezervuarin e Fierzës gjatë vitit arritën 145 m³/s, 21% më pak se mesatarja shumëvjeçare prej 183 m³/s. Kjo ulje reflektohet pothuajse në të njëjtën masë në prodhimin e energjisë.
Megjithatë, krahasuar me vite të tjera të thata si 2002, 2008, 2014, 2017 dhe 2024, prodhimi i 2025-s ishte rreth 2% më i lartë, ose 71 GWh më shumë energji e prodhuar.
KESH mbylli vitin me bilanc pozitiv në rezervën energjetike, duke akumuluar rreth 250 GWh në liqenin e Fierzës. Rezerva nisi vitin në 477 GWh dhe arriti në 727 GWh në fund. Niveli i ujit në Fierzë filloi në 269.22 metra mbi nivelin e detit (rreth 7.9 metra nën mesataren shumëvjeçare) dhe më 31 dhjetor 2025 arriti 278.76 metra, me rritje vjetore 9.54 metra dhe 1.7 metra mbi mesataren historike.
Performanca e vitit 2025 nënvizon ndikimin e ndryshimeve klimatike në prodhimin hidroenergjetik në Shqipëri. Periudhat e zgjatura të thatësirës dhe luhatjet e reshjeve e bëjnë më të paqëndrueshëm gjenerimin nga hidrocentralet. Mbi 95% e prodhimit vendas bazohet në hidroenergji, prandaj luhatjet hidrike përcaktojnë sigurinë energjetike.