Reshjet më të rënda të borës në vitet e fundit kanë goditur pjesët veriore dhe verilindore të Japonisë, duke lënë një bilanc paraprak prej 28 viktimash dhe rreth 300 personash në gjendje të rëndë. Ngjarja ka ndodhur në prefektura si Hokkaido, Niigata dhe Akita, ku kushtet ekstreme të motit kanë krijuar situatë emergjente.
Në qytetin e Sapporo-s dhe zona të tjera të prefekturës Hokkaido është raportuar trashësi bore mbi një metër, niveli më i lartë që nga viti 2022. Autoritetet lokale kanë regjistruar 12 viktima në Niigata, tetë në Akita dhe pesë në Hokkaido. Shumica e humbjeve të jetës lidhen me aksidente gjatë pastrimit të borës, si rënie nga çatitë, si dhe përkeqësime të gjendjes shëndetësore te persona me sëmundje kronike.
Shërbimet e emergjencës janë në gatishmëri të lartë për shkak të rrezikut të vazhdueshëm nga reshjet intensive. Meteorologët parashikojnë përkeqësim të situatës, me deri në 70 centimetra dëborë shtesë në Niigata dhe 50 centimetra në rajonet verilindore të ishullit Honshu.
Reshjet kanë shkaktuar anulime fluturimesh, ndërprerje të transportit publik dhe vështirësi në lëvizje, duke ndikuar jetën e përditshme të banorëve.