Politologu Albatros Rexhaj ka kritikuar qëndrimet e opozitës shqiptare, duke thënë se ato po dëmtojnë kredibilitetin e Shqipërisë në arenën ndërkombëtare dhe po pengojnë procesin e integrimit europian.
Në një reagim në rrjetet sociale, Rexhaj thekson se kritikat ndaj qeverisë janë legjitime dhe pjesë e demokracisë, por avokimi kundër interesave të Shqipërisë para partnerëve strategjikë është i papranueshëm.
Ky reagim erdhi pas një postimi të deputetes Jorida Tabaku për një takim të zhvilluar së bashku me Gazment Bardhi në Ministrinë e Jashtme Federale të Gjermanisë, ku ata u pritën nga Ministri i Shtetit për Europën, Gunther Krichbaum.
Rexhaj shkruan se, nga përvoja e tij në organizata ndërkombëtare, e di punën që bëhet kundër Shqipërisë nga ata që nuk i duan mirë historikisht. Ai shton se zërat shqiptarë që konfirmojnë narrativat e tyre i legjitimojnë ato më mirë se propaganda e huaj.
Sipas tij, Partia Demokratike nuk funksionon si opozitë konstruktive, por si forcë politike që synon rrënimin e kredibilitetit të Shqipërisë dhe pengimin e integrimit europian, kur ky proces kërkon unitet dhe argumente, jo akuza për konsum të jashtëm.
Rexhaj e cilëson këtë qasje si vetëshkatërrim. Muajt e fundit, opozita ka zhvilluar një tur vizitash në vende europiane, ku ka denoncuar qeverinë dhe u ka kërkuar partnerëve ndërkombëtarë të bllokojnë procesin e integrimit, me argumentin se Shqipëria nuk i ka përmbushur kushtet e kërkuara.