Kryetari i Këshillit Kombëtar Shqiptar, Enkel Rexhepi, tha se zgjedhjet parlamentare në Serbi kanë rëndësi të veçantë për shqiptarët e Luginës së Preshevës dhe kërkoi unitet politik e përfaqësim më të fuqishëm. Deklaratat i bëri në një intervistë për emisionin “Info Magazine” në Klan Kosova, të transmetuar më 25 tetor 2026.
Rexhepi përmendi pasivizimin e adresave dhe mosnjohjen e diplomave si çështje që, sipas tij, vazhdojnë të prekin shqiptarët e Luginës. Ai tha se përmes përfaqësimit politik, shqiptarët duhet t’i ngrenë këto shqetësime dhe të kërkojnë trajtim të barabartë.
“Është momenti që shqiptarët të kenë një zë të fuqishëm dhe të flasim me një zë të gjithë për padrejtësitë që po ndodhin në Luginën e Preshevës”, u shpreh Rexhepi.
Ai kërkoi që bashkimi i përfaqësuesve shqiptarë në institucionet e Kosovës të pasqyrohet edhe në procesin zgjedhor në Serbi. Rexhepi tha se uniteti i arritur në Qeverinë e Republikës së Kosovës duhet të shfaqet edhe përballë presidentit serb, Aleksandar Vuçiq, dhe çështjeve që ai i cilësoi si padrejtësi në Luginën e Preshevës.
“Ne duhet të jemi kompakt. U bashkuam në Qeverinë e Republikës së Kosovës dhe duhet që këtë zë dhe këtë bashkim ta paraqesim edhe para Vuçiqit, apo para padrejtësive që po ndodhin në Luginën e Preshevës”, tha ai.