Sipas të dhënave të Fondit Monetar Ndërkombëtar (FMN), rezervat ndërkombëtare të gjashtë vendeve të Ballkanit Perëndimor arritën në rreth 61,7 miliardë dollarë në vitin 2025. Treguesi përfshin arin e vlerësuar me çmimin e tregut. Të dhënat për Bosnjë-Hercegovinën janë të vitit 2024, ndërsa për vendet e tjera janë të vitit 2025.
Serbia kishte rreth 34,15 miliardë dollarë rezerva në fund të vitit 2025, pas një rritjeje vjetore prej rreth 12%. Ajo përbënte 55,4% të totalit të rajonit, më shumë se pesë vendet e tjera së bashku. Bosnjë-Hercegovina renditej e dyta me 9,42 miliardë dollarë, ose rreth 15,3% të totalit të llogaritur.
Shqipëria renditej e treta me rezerva prej 8,60 miliardë dollarësh, nga 6,52 miliardë në vitin 2024. Brenda një viti, rezervat u shtuan me rreth 2,09 miliardë dollarë, ose 32%. Kjo ishte rritja më e lartë në përqindje ndër pesë vendet e rajonit për të cilat kishte të dhëna të plota për vitin 2025. Shqipëria përfaqësonte rreth 13,9% të rezervave të kombinuara të gjashtë vendeve.
Pas Shqipërisë renditej Maqedonia e Veriut, me rreth 5,80 miliardë dollarë rezerva në vitin 2025. Krahasuar me 5,25 miliardë dollarë në vitin 2024, stoku u rrit me rreth 10,5%. Mali i Zi kishte rreth 2,20 miliardë dollarë, nga 1,74 miliardë një vit më parë, një rritje vjetore prej rreth 26,1%. Kosova kishte rreth 1,52 miliardë dollarë, nga 1,31 miliardë në vitin 2024, ose 15,7% më shumë.
Mbulimi i importeve
Rezervat e Shqipërisë mbulonin rreth 7,5 muaj importe mallrash dhe shërbimesh, niveli më i lartë në rajon. Serbia renditej pas saj me 6,7 muaj, Bosnjë-Hercegovina me 6,5, Maqedonia e Veriut me 4,4 dhe Mali i Zi me 3,5 muaj. Për Kosovën, mbulimi ishte rreth 2 muaj. Mali i Zi përdor euron dhe nuk ka monedhë kombëtare, ndaj struktura e rezervave të tij ndryshon nga ajo e ekonomive të tjera të rajonit.
Rezervat valutore administrohen nga bankat qendrore dhe mbahen kryesisht në valuta të huaja, letra me vlerë, ar dhe aktive të tjera ndërkombëtare. Ato ndihmojnë vendet të financojnë importet dhe të përmbushin detyrimet e jashtme edhe kur pakësohen hyrjet valutore. Niveli i tyre matet shpesh edhe me numrin e muajve të importeve që mund të mbulojnë.
Rezervat mund të përdoren gjithashtu për të ndihmuar në ruajtjen e stabilitetit të kursit të këmbimit. Në rast luhatjesh të forta të monedhës vendase, banka qendrore mund të ndërhyjë në tregun valutor duke blerë ose shitur valutë. Një nivel i mjaftueshëm rezervash mund të rrisë besimin e investitorëve dhe të tregjeve financiare.