Shqipëria renditet ndër vendet me rezervat më të ulëta të arit në raport me popullsinë dhe strukturën e përgjithshme të rezervave valutore. Të dhënat e publikuara nga platforma bestbrokers.com për muajin shkurt tregojnë se sasia totale e arit të mbajtur nga vendi është 3.73 tonë.
Krahasimi në rajon dhe botë
Krahasuar me vendet e tjera të rajonit të Ballkanit Perëndimor, Shqipëria paraqet një peshë më të vogël të arit në portofolin e saj valutor:
• Serbia: 24.4% e rezervës valutore
• Maqedonia e Veriut: 16.8% e rezervës valutore
• Shqipëria: 6.4% e rezervës valutore
• Bosnje-Hercegovina: 5.4% e rezervës valutore
Në treguesin e rezervave të arit për frymë, Shqipëria zotëron rreth 1.6 gramë për banor, duke lënë pas vetëm Bosnje-Hercegovinën me 1.1 gramë. Ndërkaq, Serbia mban rreth 8.12 gramë dhe Maqedonia e Veriut 3.82 gramë për frymë.
Në nivel global, ekonomitë më të zhvilluara dhe vendet e Bashkimit Europian ruajnë përqindje shumë më të larta, të cilat në disa raste kalojnë edhe 80% të vlerës totale. Shtetet me rezervat më të mëdha sasiore në botë mbeten SHBA-ja me 8133 tonë, Gjermania me 3350 tonë, Italia me 2452 tonë, Franca me 2437 tonë, Kina me 2322 tonë dhe Rusia me 2299 tonë.
Sa i përket tregut ndërkombëtar, pas rritjes së ndjeshme të vitit të kaluar, kur çmimi tejkaloi 5300 USD për onz, gjatë këtij viti çmimet e arit kanë shënuar rënie, duke u tregtuar pranë nivelit të 4100 USD për onz.