Ministri i Turizmit, Kulturës dhe Sportit, Blendi Gonxhja, ka njoftuar se riti tradicional i përgatitjes së ballokumes është shpallur pjesë e trashëgimisë kulturore jomateriale. Lajmi u bë i ditur më 30 mars përmes një postimi në rrjetet sociale, ku ministri shoqëroi njoftimin me një video të përgatitjes së recetës tradicionale.
Sipas Blendi Gonxhja, ballokumja përfaqëson në mënyrë autentike identitetin dhe traditën tonë kulinare. Ajo lidhet ngushtë me festën e Ditës së Verës dhe ka rrënjë të hershme në trevën e Elbasanit. Në këtë qytet, ballokumet gatuhen vetëm për këtë festë.
Ballokumet përgatiten me gjalpë, sheqer, vezë dhe miell misri të situr mirë. Këto ëmbëlsira janë simbol i Ditës së Verës dhe përfaqësojnë Elbasanin.
Trashëgimia kulturore jomateriale në Shqipëri përfshin traditat e gjalla, shprehjet gojore, artet interpretuese, ritet dhe zanatet tradicionale të trashëguara ndër breza. Ajo përcakton identitetin kulturor shqiptar, ku spikasin iso-polifonia, epika e kreshnikëve, veshjet popullore dhe kodet shoqërore si besa.