Ish-kampionët e botës, Ronaldo Nazário dhe Roberto Carlos, kanë marrë kontrollin e shumicës së aksioneve të klubit brazilian Inter de Limeira. Përmes një grupi investimi, ku bën pjesë edhe biznesmeni Enrico Ambrogini, dyshja ka siguruar 80% të pronësisë së klubit, ndërsa 20% e mbetur do të vazhdojnë të mbahen nga shoqata e klubit. Ky ndryshim në strukturën e pronësisë u miratua zyrtarisht nga Asambleja e Përgjithshme e klubit, pas një votimi ku propozimi mori 53 vota pro dhe vetëm një kundër.
Inter de Limeira, i themeluar në vitin 1913 dhe i njohur si "Gjiganti i Limeiras", është një klub me histori të gjatë në shtetin e São Paulos. Aktualisht, ekipi garon në Serie C të Brazilit, ndërsa synimi i investitorëve të rinj është modernizimi i qendrës stërvitore, forcimi i akademisë dhe ngjitja në kategoritë më të larta, me objektiv rikthimin në Serinë A brenda tetë sezoneve të ardhshme.
Klubi, i cili ka fituar kampionatin Paulista në vitin 1986 dhe Serinë B në vitin 1988, pret që përmes këtij investimi të krijojë një kapitull të ri në historinë e tij 112-vjeçare. Përveç investitorëve vendas, në këtë projekt janë të përfshirë edhe investitorë të tjerë ndërkombëtarë, përfshirë Princin Saudit Abdullah bin Saad bin Abdulaziz Al Saud.