Autoritetet arsimore në Shqipëri kanë miratuar rregullore të reja për Maturën Shtetërore, që parashikojnë ndryshime krahasuar me vitin e kaluar. Këto ndryshime prekin kryesisht nxënësit mbetës dhe masat disiplinore gjatë provimeve.
Drejtoresha e përgjithshme e Drejtorisë së Arsimit Parauniversitar, Mirela Cami, shpjegoi për ATSH-në se nxënësit mbetës në një apo dy lëndë gjatë vitit shkollor nuk do të lejohen të hyjnë në provimet e qershorit. Ata do të jenë të detyruar t’i japin këto provime në sezonin e vjeshtës dhe më pas të hyjnë në Maturën Shtetërore në sesionin e dytë. Në rast se rezultojnë jokalues në tre lëndë, nxënësit e humbasin vitin shkollor dhe duhet ta përsërisin.
Drejtoritë rajonale, Qendra e Shërbimeve Arsimore dhe institucionet arsimore do të njoftohen në mbyllje të vitit shkollor për listën emërore të këtyre nxënësve.
Një ndryshim tjetër lidhet me përdorimin e pajisjeve teknologjike. Maturanti që konstatohet gjatë provimit me celular, orë smart ose pajisje të tjera teknologjike përjashtohet nga ai provim, por ka të drejtë ta japë në sesionin pasardhës.
Sa i përket administratorëve të provimit, ata trajnohen dhe përcaktohen me short elektronik në praninë e drejtorit të ZVAP-së. Ata mbajnë përgjegjësi për mbarëvajtjen e procesit.